Maro (Poemo di dek-e-un vorti)

Maro

Poemo di dek-e-un vorti (Elfchen)

Maro

Sabloza plajo

La muevi krias

Natar en blua aquo

Vakanco

Somero (poemo di dek-e-un vorti)

 Somero

Poemo di dek-e-un vorti

Somero

Longa jorni

La suno brilas

Natar en la lago

Varmeso

La blua nokti en Finlando (Ido-kansono)

La blua nokti en Finlando

"Blua nokti en Finlando" esas melankolioza pop-muziko kanto en la internaciona helpolinguo Ido. Ol esas pri bela vakanco en Finlando e la melankolio ke la vakanco finas.  

Me pasas la somero, tante fore de heme,

Me reflektas e sentas tua respiro,

La varma aero tushas me tenere,

Mea anmo ne oblivias tu,

La remilo glitas kalme tra lo blua,

Nula ombro trublas la klar aquo,

Nur tu e me esas kurioza e libera,

Ni esas komune en la bela naturo.

Omna nokto esas blua quale revo,

La steli e la luno brilas misterioze,

Super la lago en la kurta hela nokto,

La alta birki kantas por ni marveloze,

La sauno varmigas mea pelo e mento,

Me askoltas la muziko dil ondi,

Me amas la blua nokti en Finlando,

Lakrimi dil joyo en mea okuli.

Me natas en la klar kolda lago,

Nur la foresto regardas me,

Mea anmo kantas ed exultas,

Me volas restar hike por sempre,

Omna dio esas nov aventuro,

Ma la tempo ne haltas,

La sento di eterna libereso,

Omna revo irgekande finas.

Omna nokto esas blua quale revo,

La steli e la luno brilas misterioze,

Super la lago en la kurta hela nokto,

La alta birki kantas por ni marveloze,

La sauno varmigas mea pelo e mento,

Me askoltas la muziko dil ondi,

Me amas la blua nokti en Finlando,

Lakrimi dil joyo en mea okuli.

Nun me vidas la lumi dil urbo,

La tempo dil libereso finas,

Tante forta quale la norda vento,

La melankolio en me kreskas,

Me pensas pri la blua nokti,

Me sospiras triste e laute,

Restas nur bela fotografuri,

Ma me memoras omno exakte.

Omna nokto esas blua quale revo,

La steli e la luno brilas misterioze,

Super la lago en la kurta hela nokto,

La alta birki kantas por ni marveloze,

La sauno varmigas mea pelo e mento,

Me askoltas la muziko dil ondi,

Me amas la blua nokti en Finlando,

Lakrimi dil joyo en mea okuli.

La unikorno salutas (somero-rakonto)

 La unikorno salutas

Tandem vakanci! Me audis per mea smartfono adminime dekfoye mea preferata somero kanzono „Somero, suno, Ido!“ e me dansis en mea chambro avan la spegulo.

La vetero esis varmega e mea maxim bona amikino Laura skribabis a me hiere: „Ni renkontros morge ye tri kloki posdimeze avan la balnerio kun Nicole.“ Nicole esis anke mea samklasanino e ni tri esis bona trio e ridis multe kune.

Me ja preparis omno bone: balno-toalo, locionajo kontre la suno, aquo-botelo e la nova numero dil Ido-Saluto. Me decidis ke esas plu bone metar la malyoto antee. Do me ne mustos chanjar mea vestaro en la balnerio. Ma me mustis konstatar ke mea nova eleganta blua malyoto ankore esis humida de hiere. Konseque me mustis uzar mea olda malyoto. Bikinio ne esis bona alternativo, pro ke en la balnerio esis tro multa homi e me ne sentis me bone ibe en bikinio. La olda malyoto esis nun poke infantatra. La malyoto esis rozea e havis imprimigita imajo di blanka unikorno. Nun, me evis 14 yari e ca motivo esis poke ridinda por mea evo. Me pensis, ke to ne esis problemo pro ke ni esis nur inter ni yunini e certe ni povos ridar pri to kune. Ultre to me metis bunta t-kamiso e kurta blanka pantalono super la malyoto. Me kunligis mea longa bruna hararo a kavalo-kaudo. Me stacis avan la spegulo e dicis a me ipsa: „Emma, to esas perfekta por la balnerio“.

Me esis ja survoye kande mea posh-telefonilo sonis. Me haltis e regardis mea smartfono. Nova mesajo da Laura: „Ni manjos kremo-glacio che la 'Florida' ye tri kloki.“ Me sospiris e chanjis la direciono. Do ne direte al balnerio, ma al 'Florida' en Tegel.

Kande me arivis per mea biciklo, me ja vidis Nicole e Laura. Eli signifis per la manuo a me. Ma lore venis la shoko. Eli ne esis sola, ibe anke esis Jan e Felix. Jan! Mea kordio palpitis plu rapide pro ke me esis sekrete poke amoroza ad il. Nur poke! Vere!

Kande me vidis mea amikini me pavoreskis. La altra yunini portis bela somero-robi e kolorigabis sua labii. Eli aspektis eleganta. E me aspektis quale la leda juniora fratino di eli. Jan weris eleganta nigra polo-kamiso, qua bone fitis a sua blonda hararo. Mea amikini kuafabis sua hararo bele e me portis mea hararo nur en simpla kavalo-kaudo. Me shamis me pri to e me preferus irar quik adheme, ma nun esis tro tarda.

Laura regardis fixe a me: "Ka tu ne lektis mea mesaji, Emma?"

Me questionis surprizita: "Yes, certe. Pro quo?"

El susuris aden mea orelo: "Me skribis, ke ni iras manjar kremo-glacio e ke Jan e Felix akompanos ni e ke la balnerio esas hodie klozita pro teknikala problemi."

Me regardis ad el: "Ka tu sendis du mesaji?"

Laura inklinis la kapo. Me sospiris e susuris: "Quo? La balnerio esas klozita! No, me recevis nur tua unesma mesajo."

Me kontrolis mea smartfono. E vere! Esis duesma mesajo quan me ne lektis pro ke me ne havis telefono-reto en la foresto.

Me glutis, nun me komprenis la tota situeso. Me nun mustis sidar dum manjar kremo-glacio apud Jan.

Me esis tre nervoza e ne parolis multe en la Florida. Me ne provis movar me multe, por ke Jan ne devis vidar la stulta malyoto. La balno-kostumo esis vere streta en kelka parti di mea korpo. Me mustis konstatar ke ol esis tre nekomoda ed anke esis tro varma por sidar en restorerio. Ni mustis sidar en la suno pro ke esis multa personi en la Florida. Do mea kapo redeskis e me sudorifis plu e plu. Me mustus desmetar la T-kamiso, to esus la solvuro, ma lore Jan e la altra amiki vidus mea infantatra malyoto. Quon me povis facar? Me regardis mea saketo. Esis nur mea balno-toalo, mea locionajo kontre la suno e mea revuo. Nula altra vesti. Me ne prenis kun me vesti por chanjar. Do me mustis restar en mea olda unikorno-malyoto dum la tota jorno.

Me komendis bulo de frago-kremo-glacio e probis me kondutar normale. Jan naracis ulo e me koncentris me ad il e regardis il. Ca yunulo vere aspektis bone e povis bele parolar. Me ridetis dolce revante. Lore eventis la maxim granda posibla acidento. Subite guto de ja liquideskinta kremo-glacio falis sur mea T-kamiso. Sen pensar me levis ol por ne lasar la reda glacio fluar aden mea blanka kurta pantalono. To esis granda eroro. Por instanto omni povis vidar mea infantatra malyoto. La blanka unikorno quaze salutis li.

Unesme omni tacis, ma subite Nicole rideskis laute e me vidis ke la okuli di Jan plugrandigis su ed anke il e Felix mustis ridar. Laura vidis a me serioze e dicis: "Pro quo tu portis malyoto?" Subite el helpis me netigar mea vestaro per tuko, ma esis tro tarda. Me desmetis la T-kamiso e nun me sidis an la tablo en mea malyoto kun unikorno. Forsan la unikorno nun anke ridis.

Me preske ploreskis e me vokis: "Pro ke me pensis ke ni iras natar. Me ne lektis la duesma parto di tua mesajo quale tu savas."

Anke ye la altra tabli plura personi gapis a me. To esis vera katastrofo. Felix mem facis stulta joko e dicis: "Mea juniora fratino havis simila malyoto, ma el evis sep yari."

Nicole e Laura mustis ridar, ma Jan dicis: "Emma aspektas bela ed anke me preferus natar nun. Me anke portas balno-kalsono sub mea kurta pantalono. Forsan ni povas irar al lago?"

Mea amiki diskutis ca propozo e li tote obliviis mea malyoto. Me iris a la balno-chambro dil restorerio por netigar me e sikigar mea lakrimi. Kande me retrovenis, la tota afero esis ja obliviita. Me regardis gratitudoze a Jan. En ca instanto me komprenis ke il esis multe plu jentila kam me pensabis antee. Me kredis ke la unikorno konsentis.

Suno, somero, Ido! (Ido-kansono)

Suno, somero, Ido!

Somerala Ido-kansono che YouTube

"Suno, somero, Ido!" esas pop-muziko kansono. La kansono esas segun la stilo Euro-pop danso kansono por festar la somero. Me itere kreis la muziko dil kanto per la helpo dil programo Suno kun artificala inteligenteso, ma kompreneble me itere skriptis ipsa la texto.  La video havas subtituli in Ido, ma serchez ad "Esperanto" en la selekto dil subtituli  pro ke YouTube ne havas Ido en la menuo. Me deziras a vi bela somero 2026!

!

Esas tempor por: 

Suno! 

Somero!

Ido! 

Yes! Yes! Yes!

Tandem arivis la vakanci,

tempo por mea amiki, 

nula skolo, nula laboro, / 

nun komencas la joyo. 

La suno brilas en la cielo,

me audas la bela muziko, 

la maro vokas me, 

me kantas laute.

Suno, somero, Ido! 

Dansez kun me til la matino, 

sub la suno, sub la luno, 

festar sur plajo, sidar en la sablo. 

Vakanci en la somero, 

natar en la blua maro. 

Ka bikinio o malyoto, 

esas la sola importanta decido! 

Varma vento sur mea vizajo, 

an la varma blua maro, 

sablo sub mea pedi,

kisar sub la steli. 

Forsan venas nov amoro, 

la dolca tempo dil yuneso,

me sentas la varmega kisi, 

me prizas bella kanti. 

Suno, somero, Ido! 

Dansez kun me til la matino, 

sub la suno, sub la luno, 

festar sur plajo, sidar en la sablo. 

Vakanci en la somero, 

natar en la blua maro. 

Ka bikinio o malyoto, 

esas la sola importanta decido! 

La nokto venas lente, 

la muziko finas tro rapide, 

sub la luno ni dansas,

til la suno ribrilas. 

Suno, somero, Ido! 

Dansez kun me til la matino, 

sub la suno, sub la luno, 

festar sur plajo, sidar en la sablo. 

Vakanci en la somero, 

natar en la blua maro. 

Ka bikinio o malyoto, 

esas la sola importanta decido! 

Esas tempor por: 

Suno!  

Somero! 

Ido! 

Yes! Yes! Yes!